O‘zbekiston va Qozog‘iston: Bog‘dorchilikda strategik hamkorlikning yangi bosqichi
Qozog‘iston Respublikasining Turkiston viloyati delegatsiyasining O‘zbekistonga tashrifi doirasida akademik M. Mirzayev nomidagi bog‘dorchilik, uzumchilik va vinochilik ilmiy-tadqiqot institutida yuqori saviyada rasmiy uchrashuvlar hamda amaliy tanishuvlar tashkil etildi.
Delegatsiyani kutib olish marosimi tantanali va samimiy ruhda o‘tkazilib, unda institut direktori Faxriddin Dehqonovich Kirgizboyev mehmonlarni iliq qarshilar ekan, tashrifning mazmun-mohiyati va istiqboldagi hamkorlik imkoniyatlari haqida atroflicha to‘xtalib o‘tdi. Institut direktori o‘z nutqida bugungi kunda ilm-fan va amaliyot uyg‘unligini ta’minlash hamda innovatsiyalarni joriy etish orqali agrar sohada yuqori samaradorlikka erishish nafaqat O‘zbekiston, balki butun Markaziy Osiyo mintaqasi uchun dolzarb vazifa ekanini alohida ta’kidladi.
Tashrif davomida asosiy e’tibor institutda olib borilayotgan ilmiy izlanishlar, seleksiya yutuqlari hamda mevali va uzum ekinlari uchun ilg‘or ko‘chat yetishtirish texnologiyalarini chuqur o‘rganishga qaratildi. Shu bilan birga, mutaxassislar o‘rtasida tajriba almashinuvi yo‘lga qo‘yilib, zamonaviy agrotexnik yondashuvlar yuzasidan sermazmun muhokamalar o‘tkazildi.
Shuningdek, ko‘chat yetishtirishning amaliy jarayonlari keng yoritilib, zamonaviy yondashuvlar asosida ko‘chat parvarishi va yuqori sifatli mahsulot tayyorlash bosqichlari namoyish etildi. Jarayonda resurs tejamkor texnologiyalarni qo‘llash, suv va o‘g‘itlardan samarali foydalanish hamda eksportbop mahsulot yetishtirish masalalari ustuvor yo‘nalish sifatida ko‘rsatildi.
Muloqotlar davomida institut olimlari tomonidan olib borilayotgan tadqiqotlarning amaliy natijalari taqdim etilib, delegatsiya vakillari bilan ochiq fikr almashinuvi tashkil etildi. Bu esa tomonlar o‘rtasida o‘zaro ishonchni mustahkamlash va istiqbolli hamkorlik yo‘nalishlarini aniq belgilashga xizmat qildi.
Bundan tashqari, delegatsiya vakillari bilan Toshkent ilmiy-tajriba stansiyasi hududidagi binoda rasmiy uchrashuv ham tashkil etildi. Unda institut faoliyati, boy tajribasi va ko‘p yillik ilmiy yutuqlari yuzasidan batafsil taqdimot o‘tkazildi. Shuningdek, erishilgan natijalar, amalga oshirilayotgan loyihalar hamda kelgusidagi rivojlanish rejalari haqida atroflicha ma’lumot berilib, tomonlar o‘rtasida ochiq va mazmunli muloqot bo‘lib o‘tdi.
Tashrif doirasida delegatsiya a’zolari stansiya hududida yetishtirilayotgan payvandtaglar bilan yaqindan tanishtirilib, ularni yetishtirish, parvarishlash hamda keyingi bosqichlarga tayyorlash jarayonlari amaliy tarzda ko‘rsatib berildi. Shu bilan birga, stansiyadagi intensiv bog‘lar holati, ekinlarning rivojlanish darajasi va qo‘llanilayotgan agrotexnik yondashuvlar ham batafsil namoyish etildi. Mutaxassislar tomonidan payvandtaglarning sifat ko‘rsatkichlari, agrotexnik talablari, iqlim sharoitiga moslashuvi hamda samarali yetishtirish usullari yuzasidan keng qamrovli tushuntirishlar berildi.
⏺Shuningdek, qulupnay yetishtirishga ixtisoslashgan issiqxona faoliyati bilan tanishtirilib, unda ochiq va yopiq muhit sharoitlarida yetishtirish texnologiyalarining o‘ziga xos jihatlari, farqlari va afzalliklari stansiya xodimlari tomonidan atroflicha izohlandi. Amaliy misollar asosida olib borilgan ushbu tanishuv delegatsiya vakillariga zamonaviy yetishtirish usullari, resurslardan samarali foydalanish va hosildorlikni oshirish yo‘llari haqida aniq va keng tasavvur berdi.
Ushbu tashrif ilmiy-amaliy hamkorlikni yanada rivojlantirish, ilg‘or tajribalarni ommalashtirish va agrar sohada samaradorlikni oshirishda muhim ahamiyat kasb etadi.
Ilm va amaliyot uyg‘unligi — barqaror taraqqiyotning mustahkam poydevoridir!
Bizni kuzatishda davom eting!
WEB SAYT TELEGRAM INSTAGRAM FACEBOOK YOUTUBE
